"Ons kan nie kommentaar lewer op die verslag nie. Die saak sal voorgelê word aan die NUK se nasionale uitvoerende komitee iewers tydens die vergadering," het die partywoordvoerder Keith Khoza gesê.
Hy het dié opmerkings in Centurion by 'n vyf-dag vergadering van die NUK gemaak wat Donderdag begin het.
Die Business Day berig dat die studie, wat saamgestel is deur drie ekonome, bevind het dat die nasionalisering van myne ongrondwetlik sal wees.
Dit het tot die gevolgtrekking gekom dat die regering nie kan bekostig om 'n aandeel in die myne te koop nie.
Die studie het glo aanbeveel dat 'n opwaartse hersiening van tantieme en belastingvoorwaardes oorweeg word, het die koerant berig.
'n Afsonderlike verslag deur die ANC se ekonomiese transformasiekomitee, wat ook glo nasionalisering teenstaan en groter voordeel vra, sal na verwagting deur die NUK bespreek word.
Khoza het gesê dat alle verslae wat ingedien is, onder die loep geneem sal word by die vergadering.
Die komitee het sy vergadering Donderdag afgeskop met geen teken van die geskorsde Jeugliga-leier, Julius Malema, nie.
Malema, wat oproepe vir nasionalisering lei, sal na verwagting die vergaderings bywoon, het Khoza gesê.
'n Politieke ontleder het Donderdag gesê dat daar geen steun van die meerderheid binne die ANC vir die nasionalisering van die myne bestaan nie, selfs nie van die mense wat beweer om ten gunste daarvan te wees nie.
"Die meerderheid van die ANC se NUK-lede is mense wat aandele besit, of sit op die direksies van hierdie besighede en hulle gaan nie hul eie besigheid sluit nie," het ontleder Steven Friedman gesê.
"Daar is geen beduidende steun vir die nasionalisering in die ANC nie en daar was nog nooit."
Friedman het gesê die NUK sal die verslag oor die nasionalisering bespreek, maar sal dit nie beleid maak nie.
"Daar is 'n kamtige debat oor nasionalisering .... Dit is 'n debat deur diegene wat sê dat hulle teen dit is en diegene wat voorgee om ten gunste daarvan te wees," het hy gesê.
"Ons het die jaar begin met die ANC wat nie nasionalisering ondersteun nie en ons sal die jaar eindig met die ANC wat nie nasionalisering steun nie."
Susan Booysen het gesê die verslag skets die "belaglike" idee van die nasionalisering van myne.
"Myne kan beter bydra sonder om dit te nasionaliseer," het sy gesê.
Booysen het gesê sy stem saam met die berig dat ekonome, wat die verslag geskryf het, 'n hersiening van tantieme en belastingvoorwaardes aanbeveel.
"Hulle skets sekere opsies .... ek meen hulle sal kom met 'n belastingoplossing wat meer haalbaar is."
Sy het gesê sy verwag dat nasionalisering hoog op die agenda by die NUK-vergadering sal wees.
Nog 'n ANC-woordvoerder Jackson Mthembu het gesê dat president Jacob Zuma sy oorsig aan die NUK in die oggend gelewer het.
ANC-voorsitter, Baleka Mbete, sal na verwagting 'n verslag oor die party se eeufeesvieringe voorlê.
In sy toespraak het Zuma lede aangemoedig om "buite grense te dink oor hoe om beleid, wat een van die ANC se swakhede is, te implementeer.
"Die president het beklemtoon dat die ANC baie goed is met die voorstel van 'n wonderlike beleid, maar waar ons te kort skiet is in die implementering daarvan," sê Mthembu.
Ander sake wat bespreek moet word het ingesluit onderwys, gesondheid, maatskaplike ontwikkeling en die party se algehele program vir die jaar. Mthembu het gesê daar was 'n paar van die areas wat hersiening van beleid benodig.
ANC-leiers sal hierdie sake bespreek met die doel om werk te skep en 'n beter lewe vir Suid-Afrikaners, het hy gesê.
Konsepbeleidsdokumente, waarop Suid-Afrikaners kan kommentaar lewer, sal binnekort vrygestel word na die afloop van die vergadering, en voor die party se beleidskonferensie in Junie.
Mthembu het ook gesê die finansiële probleem in Limpopo is nie op die NUK se agenda nie en dis nie seker of dit bespreek sal word nie.
| < Vorige | Volgende > |
|---|
